由全油車轉左 Hybrid 一個月多 D，暫時對部 RAV4 Hybrid 都幾滿意，特別係寧靜同加速，就好似去左另一個層次。由於部車用全合成偈油，廠方就建議 16,000km 先需要換第一次油。不過小編綜合唔同意見下，結論係偈油密 D 換始終係利多於弊，特別係新車過左 run in period 之後就建議換一次偈油，減少之後保養嘅問題。
與其假手於人，小編就膽粗粗決定自己動手。買齊對應嘅偈油、油隔同相關工具之後，真正動手換油其實又比想像中容易，基本上只係鬆開車底蓋，移走舊油隔再比 D 時間放清舊油，換新油隔同倒入新油就得。比較要留意嘅係完成後記得要 Run 一 Run 部車，再睇下油尺，確保油量唔好過低或過高就可以。
雖然出面揾人換油連工包料可以抵到 CAD100 有找，而今次自己換，油、Filter 連同工具價錢唔會平得幾多，不過就勝在一手一腳自己控制，又學多樣野（有聽聞出面換油，技工唔記得上緊車底蓋，最後喺路面拖爛），而且下次換油唔洗再買工具，咁就即刻回本啦。
